Қайрат Шораұлы Сарыбай

Қайрат Шораұлы Сарыбай (8 маусым 1966, Алматы) — қазақстандық мемлекеттік қайраткер, дипломат, Түркия (1999—2003) мен Германиядағы (2003—2007) елші. І дәрежелі елші.

Өмірбаяны

1966 жылы 8 маусымда Алматыда ғалым Шора Сарыбаевтың отбасында дүниеге келді. Кіші жүздің Байұлы тайпасының Байбақты руының ішіндегі Бұғанай тармағынан шыққан.

Білімі

1988 жылы Ленинград мемлекеттік университетін (қазіргі Санкт-Петербург мемлекеттік университеті) “филолог-шығыстанушы” мамандығы бойынша тәмамдады.

Еңбек жолы

• 1988—1991 — Қазақ КСР ғылым академиясы ұйғыртану институтының қызметкері, КСРО ғылым академиясы тіл білімі институтының ленинград бөлімшесінің тәжірибеші ғылыми қызметкері;
• 1991—1996 — Қазақстан сыртқы істер министрлігі консулдық департаментінде, ақпараттық-талдау департаментінде, Қазақстанның Түркиядағы елшілігінде дипломатиялық қызметте жұмыс істеді;
• 1996—1997 — Қазақстан президентінің хаттама қызметінің басшысы;
• 1997—1998 — Қазақстан президентінің баспасөз хатшысы;
• 1998—1999 — Қазақстан сыртқы істер министрінің орынбасары;
• 1999—2003 — Қазақстанның Түркиядағы елшісі;
• 2003—2007 — Қазақстанның Германиядағы елшісі;
• 2007—2008 — Қазақстан сыртқы істер министрінің орынбасары, Еуропа одағымен ынтымақтастық жөніндегі ұлттық үйлестіруші;
• 2008—2010 — Қазақстан президентінің халықаралық істер жөніндегі көмекшісі;
• 2010—2014 — Қазақстан сыртқы істер министрінің орынбасары;
• 2014—2020 — Қазақстанның Аустрия мен Словениядағы елшісі және Венадағы халықаралық ұйымдардағы тұрақты өкілі.

Жеке өмірі

Үйленген, жұбайы Лейла Болатқызы Махат (1970 туған) — суретші, Қазақ ұлттық өнер университетінің “кескіндеме және мүсін” кафедрасының доценті, Еуразия өнер академиясының президенті.

Балалары: ұлдары — Елден (1989 туған) мен Темірлан (2010 туған) және қыздары — Дәрия (1999 туған) мен Инара (2012 туған).

Әкесі Шора Сарыбаев (1925—2018) — ғалым, филология ғылымдарының докторы, тілтанушы.

Бауырлары: тәтесі Майра (1957 туған) — филология ғылымдарының кандидаты, тілтанушы; тәтесі Салтанат.

Марапаттары мен атақтары

• Астана медалі (1998)
• Қазақстан Республикасының тәуелсіздігіне 10 жыл медалі (2001)
• Қазақстан Конституциясына 10 жыл медалі (2005)
• Ерен еңбегі үшін медалі (2006)
• Астанаға 10 жыл медалі (2008)
• Құрмет ордені (2011)
• Қазақстан Республикасының тәуелсіздігіне 20 жыл медалі (2011)
• Қазақстан Конституциясына 20 жыл медалі (2015)