1930—1933 жылдардағы Қазақстандағы ашаршылық бетінің бастапқы мәтінін қарау

{{Оқиға|өлім=1.5-2.3 миллион адам|атауы=Қазақстандағы ашаршылық|дата=1930-33 жж.|орын=[[Қазақ Автономиялы Кеңестік Социалистік Республикасы|Қазақ АКСР]], [[Ресей Кеңестік Федерациялық Социалистік Республикасы|Кеңестік Ресей]] ішіндегі автономия <br/>[[Кеңес Одағы]]|карта ел=Қазақстан|түрі=[[Ашаршылық]]|шығын=[[Қазақтар]] республика халқының 60%-дан 38%-ға дейін түскен. <br/>Қазақ халқының отырықшыландыруы<br/>Қазақтардың елден қашу|себебі=[[Ауыл шаруашылығын ұжымдастыру|Ұжымдастыру]] <br/>|сурет=ALAGolod.jpg|сурет атауы=Ашаршылықтың құрбандары үшін [[Алматы|Алматыдағы]] болашақта қоятын ескірткішке тірегі}}

1930–1933-ші жылдардағы болған '''Қазақстандағы ашаршылық''' (кейде жай '''Ашаршылық''') — [[Қазақ Автономиялы Кеңестік Социалистік Республикасы|Қазақ АКСР]] жеріндегі ашаршылық. Ол кезде Қазақстанда шамамен 1.5 миллион адам қайтыс болып, олардың 1.3 миллионы қазақтар болған. Ашаршылық кесірінен қазақтар саны 38-42%-ға кеміген. Бұл — 1930-шы жылдардағы Кеңес одағында болған ашаршылықтардың ең үлкен пайызы. Басқа деректер бойынша ашаршылықта 2–2.3 миллион адам қайтыс болған.

Ашаршылық 1930-шы жылда, [[Голодомор|Голодоморға]] жыл бұрын басталған. Ашаршылық кесірінен қазақтар өз республикасында азшылық болып ұшырап, тек 1990-шы жылда қайта көпшілік болған. Ашаршылық кесірінен қазақтардың бөлігі басқа елдерге, әсіресе [[Қытай Республикасы (1912—1949)|Қытайға]], [[Ауғанстан|Ауғанстанға]] және [[Түркия|Түркияға]] қаша бастады. 

Ашаршылықтың басты себебі — ұжымдастыру деп саналады. Кейбір тарихшылар бұл оқиғаны [[геноцид]] деп есептейді. Атап айтқанда, америкалық зерттеуші Сара Кэмерон The Hungry Steppe атты кітабында бұл оқиғаларды қазақтарға қарсы геноцид ретінде бағалауға болатынын көрсетеді.

== Ауылды кеңестендіру ==
[[Сурет:Памятная доска о жертвах голода в Казахстане 1932-1933 гг.jpg|нобай]]
Голощекин ауылды кеңестендіру жүмысы әлі де әлсіз, оны күшейту керек деп есептеді. Бұл істегі, яғни кеңестендірудегі кемшіліктерді қазақ байларына, рулық қатынастарға жапты. Оған жергілікті ерекшеліктерді ескере отырып жүргізілетін шаралар ұнамады. Кеңестендіру ісінде де таптық тұрғыда қарау кажет дегенді желеу етіп, ауылдағы ауқаттыларға қарсы күресті күшейтуді ұсынды. Оның бұл солақай бағыты да қазақ [[Басшылық|басшылары]] мен зиялыларының қарсылығына кезікті. Оларды «[[оңшылдар]]», «[[солшылдар]]» деп топтарға бөліп, қудалады. Ақыры, [[Иосиф Виссарионович Сталин|Сталиннің]] тікелей қолдауымен 1927 жылы Қазақстандағы ауылдык кеңестерге жаңа сайлау өткізуді ұйымдастырды. Ол бойынша байлар деп есептелгендер сайлау құқынан айырылады. Ауылдарда кедейлер жиналыстары өткізілді. Сайлау науқанын жүргізу үшін аудандарға арнайы уәкілдер жіберілді.<br>
[[Сурет:Stalin 1945.jpg|thumb|right|200px|Иосиф Виссарионович Сталин]]
1928 жылғы 1 қазанда [[Қазақстан]]дағы барлық кеңестердің 2199-ы қазақ шаруаларының, 1209-ы орыс-украин шаруаларының кеңестері болды. Бірақ бұл жаңа сайланған кеңес органдары да өздерін жетекші [[күш]] ретінде көрсете алмады. Сондықтан да [[Голощёкин Филипп Исаевич|Голощекин]] жергілікті ұйымдар мен одақтарға, әсіресе «Қосшы» одағына көбірек арқа сүйеуді талап етті. Жергілікті кеңестердің белсенді органдарға айналуына жоғарыдан жіберілген уәкілдер де көптеген кедергілер келтірді. Олар жергілікті кеңестермен санаспай, басшылық жұмысты өз қолдарына алуға ұмтылды. Бұл кеңестердің беделін түсірді. Оның үстіне қазақ [[ауыл]]дарындағы ғасырлар бойы өмір сүріп келе жатқан рулық-туыстық жүйеге қарағанда көптеген мәселелерді шешуде кеңестер қауқарсыз еді. Мұнымен бірге [[қазақтар]] келімсек еуропалықтардың үкімет тарапынан өздеріне карағанда біршама жеңілдіктер алуына әрқашан наразы болды. Мұның өзі қазақтар тарапынан [[үкімет]]ке, оның жергілікті органы деп танылған кеңестерге сенімсіздікті қалыптастырды.

Ал селолық кеңестер жиналыстарында кулактар мен ауқатты шаруалар өз ұсыныстарын өткізуге тырысып отырды. Әсіресе орыс қазақтары сословиелік қалдықтар мен атамандық ықпалды сақтап калды. Бұлар да кеңес жұмыстарының жандануына кедергі келтірді. Партиялық өктемдік пен тоталитарлық тәртіптің орнай бастауы вертикалды басқару жүйесін қажет етті. Сол себепті де кеңес ұйымдары демократиялық сипаттағы емес, әкімшіл-әміршіл басқарудың өзіндік сатысына айнала бастады.

== Астық пен ет дайындау және ұжымдастыру ==
1920 жылдардың соңында Қазақстанда күштеп астық пен ет жинау кең етек алды. Ол, әсіресе Сталиннің 1928 жылы қаңтардағы Сібірге сапарының барысында [[Новосибирск|Новосібір]] мен [[Омбы]]да сөйлеген сөздерінде РКФСР [[Қылмыстық кодекс|Қылмыстық Кодексінің]] 107-бабын жаппай қолдануды талап етуінен кейін қатыгездік сипат алды. Ол бапта тауарларды сатып алу, жасыру немесе базарға шығармай ұстау арқылы бағасын жоғарлатқаны үшін қатал жазалау қарастырылған еді. 1929 жылы 13 ақпанда БК(б)П Қазақ өлкелік комитетінің алқалы мәжілісінде [[Голощёкин Филипп Исаевич|Голощекин]] астық дайындау ісінде өзіне жеке шешім қабылдау құқығын беретін қаулы шығартты.

[[Астық]] пен [[ет]] дайындау мәжбүрлеу, жазалау және [[үрей]] туғызу арқылы жүргізілді. Елдің тұрмыс-тіршілігінен хабарсыз Голощекин тіптен егіншілікпен айналыспайтын көшпелі малшылардан астық өткізуді талап етті. Мысалы, астық салығынан 2 жыл мерзімге босатуға жататын [[Түркістан облысы]]ндағы көшпелі мал шаруашылығы [[Талас ауданы|Талас]] және [[Созақ ауданы|Созақ аудандарында]] астық даярлау жүргізілді. Ал етке өткізілуге тиіс мал басы саны қолда бар мал басынан анағұрлым асып түсіп жатты. Мәселен, [[Балқаш ауданы]]нда бар малдың басы 173 мың болса, етке өткізілуге тиіс малдың саны 300 мың болып белгіленді. Ауданның 3 жылда етке мал өткізу жоспары 160 мың бас малдан 1,5 млн бас малға, яғни 10 есеге дейін өсті. 1933 жылы 10—16 шілде күндері өткен БК(б)П Қазақ өлкелік комитетінің алтыншы пленумында сөйлеген [[Нұрмұхамедов|Х. Нұрмұхамедов]] мынадай деректер келтірді: «Менің бауырымның, яғни 12 жыл жалшы болған кісінің бір ғана сиыры болды. [[Егіншілік]]пен ешқашанда айналыспаған. Соған қарамастан оған 1930 жылы 5 пұт астық салығын салып, бұл астықты төлеу үшін соңғы сиырын және үйдегі мүліктерін сатуға мәжбүр болды. Өкінішке орай мұндай жағдайлар өте көп кездеседі». Сөйтіп, жергілікті жерлерде [[егіншілік]]пен айналыспағандарға астық, малы жоқтарға ет салығын салу кең өріс алды. Оны орындамаған жергілікті басшылар да, шаруалар да жазаға тартылды. Сол себепті ешкімнің ешкімді аямауы, әрқайсысы өз басын қорғау үшін жауапкершіліктен бас тарта отырып, басқаларды [[құрбандық]]қа шалу үйреншікті қалыпқа айналды.

Сталиндік-сібірлік тәсілді негізге алған Голощекин астық пен ет дайындау науқаны барысындағы қателіктерін кулактар мен байларға қарсы күрес желеуімен бүркемеледі. [[Азық-түлік]] дайындау науқаны шаруалардың шаруашылығына ғана емес, өз өмірлеріне де қауіп туғызды. Партия басшыларының қатыгез [[саясат]]ы жергілікті жерлерде үрей отын шашты. Өйткені [[партия]]ның арнайы және жергілікті өкілдері 107-баппен соттау, түрмеге камау әрекеттерін кең жүргізді. Ал 1932—1933 жылдары азық-түлік даярлау барысындағы жазалау шараларын қатаңдатқан, негізінен, ату жазасын белгілеген бірнеше құжат жарық көрді.

1932 жылғы 7 тамызда қабылданған «Мемлекеттік кәсіпорындардың, [[ұжым]]дар мен [[кооперация]]ның мүлкін қорғау және қоғамдық (социалистік) меншікті нығайту туралы» заңы жазалаушылық әрекеттерді одан әрі өршіте түсті. Ол [[заң]] бойынша ату, немесе жазасын жеңілдетіп, мүмкін жағдайда мүлкін тәркілеп 10 жылға түрмеге отырғызу жазасы белгіленген еді. Осылайша қанқұйлы саясат ұстаған басшылар қарапайым халық күйзелісін шегіне жеткізді. Алдымен мал, одан соң адамдар жаппай қырылды. Торғай облысында, мәселен 1931 жылғы 100 мың бас малдан 1933 жылы бар-жоғы 4 мыңы ғана қалды.

Жаппай ұжымдастыру да жоғарыдан берілетін [[бұйрық]]тар мен нұсқаулар арқылы жүргізілді. 1930 жылы 5 каңтардағы БК(б)П ОК-нің «Ұжымдастырудың қарқыны және мемлекеттің ұжымшар [[құрылыс]]ына көмектесу шаралары туралы» қаулысында Қазақстанда жаппай ұжымдастыруды, негізінен, 1931 жылдың күзінде немесе 1932 жылдың көктемінде аяқтау міндеті қойылды. Осылайша тағы да жергілікті ерекшеліктерді ескерместен, жоғарыдан қысым жасау басталды. Шаш ал десе бас алуға дайын тұрған [[Голощёкин Филипп Исаевич|Голощекин]] ұжымдастыру ісін барынша тездетуге тырысты. Жаппай ұжымдастыру айлықтарын өткізді. 1932 жылдың 1 каңтарында отырықшы аудандардың көпшілігіндегі ұжымдастыру 60—80%-ға дейін жеткізілді. Ал көшпелі қазақ ауылдарын ұжымдастыру [[қарқын]]ы бұдан да тез жүргізілді. Ол көп жағдайда күштеу, корқыту, жазықсыз жазалау әрекеттері арқылы іске асырылып отырды. Ұжымдастыру қарсаңында Қазақстанда 1218 мың шаруа қожалықтары болған. Ұжымдастыру аякталған соң 1933 жылдың ортасында оның 628 мыңы ғана қалды.

Байлар мен кулактарды тап ретінде жою [[шара]]ларын даярлау мәселелеріне байланысты Өлкелік партия комитеті жанынан жасырын үштік құрылды. Үштіктің 1930 жылы 23 қаңтарда өткен алғашқы жасырын [[мәжіліс]]інде жаппай ұжымдастыру болатын аудандардан кулак қожалықтарын жер аударуды екі бағытта жүргізу — Қазақстанның ішінде және Қазақстаннан тыс жерлерге [[жер аудару]] көзделді. Осы жұмысты ұйымдастыру үшін округтерде де оперативтік үштіктер құрылды. Олардың құрамына округтік партия комитеттерінің хатшылары, [[округ]]тік атқару комитеттерінің төрағалары, ОГПУ-дің басшы [[қызметкер]]лері кірді. Оларға кулак отбасыларын есепке алуға 10-ақ күн уақыт берілді. Қысқасы, барлық жұмыстар шұғыл, асығыс және қатал түрде жүзеге асырылды.

Партия, кеңес және ОГПУ органдары және олар арандатқан шолақ белсенділер өз халқына қарсы аяусыз соғыс жариялады. Әсіресе Өлкелік партия комитеті жанынан құрылған бай-кулактарды тап ретінде жою шараларын даярлаған, құрамында ''Құрамысов, Альшанский'' және ''Асылбеков'' бар комиссия ерекше белсенділік танытты. 1930 жылы ақпан айында байлар мен кулактардың қожалықтары жер аударылатын құла-дүз, жері құнарсыз тоғыз аудан белгіленді. Олар темір жолдардан, [[өнеркәсіп]] орындарынан, шекарадан әлдеқайда қашық, елсіз-сусыз, [[шөл]] және шөлейт, бұрын халық тұрмаған аймақтар болатын. Алғаш бұл аудандарға шамамен 24 мың бай-кулак қожалықтары жер аударылатын болып белгіленді. Жер аударылатындардың әрбір жаңа [[ауыл]]ы 50 үйден аспауға тиіс болды.

== 1932—1933 жылдардағы ашаршылық ==
[[Сурет:FINAL PROJECT.pdf|нобай]]
[[Шабындық]] және егістік жерді қайта бөлу, тәркілеу, азық-түлік салығы, күштеп [[Отырықшылық|отырықшыландыру]] мен ұжымдастыру барысындағы зорлық-зомбылықтардан көп азап шеккен ең алдымен қазақ халқы болды. Бар дүниесінен, мал-мүлкінен, құрал-саймандарынан, тіпті жертөлесінен де айырылған қазақтар ашаршылыққа ұшырап, босқын күйге көшті.

Ауыл шаруашылығында егіншілік көлемі күрт азайып кетті. Мал шаруашылығы терең күйзеліске ұшырады. ''Ұжымдастыру қарсаңында Қазақстанда 40,5 млн бас мал болды, ал 1933 жылдың 1 қаңтарында олардан қалғаны бар болганы 4,5 млн бас еді''. 1931—1933 жылдары бүкіл Қазақстанды құшағына алған аштықтан 6,2 млн республика халқының 2,1 млн-ы қырылды.

Өлкелік [[партия]] комитетінің [[Торғай ауданы]]ндағы уәкілі 1932 жылдың қыркүйегінде мұнда әр адам басына орта есеппен 56 килограмм ғана астық және бір ғана мал калғанын, ал бұлар алты айдан кейін мүлде таусылып, [[қаңтар]]дың соңына қарай, қыстың кақаған, сары аязында нағыз қиямет-қайым орнайтынын алдын ала ескертіп, дабыл қақты. Ол сонымен бірге кейбір толық емес мәліметтер бойынша ауданда ең кемі 2042 адам аштық құрбаны болғанын, ал 8500 адам аштан өлейін деп жатқанын ''Құрамысов'' пен ''Кахианидің'', ''Исаев'' пен ''Құлымбетовтың'' аттарына жолдаған ресми [[мәлімдеме]]сінде ашық айтты. Анадан туғандай тыржалаңаш, аш адамдардың дала төсінде босып сандалып жүргендерін, басқасын былай қойғанда, олардың даладағы [[Ат құлақ|атқұлақ]] пен [[Сарышұнақтар|сарышұнақты]] түгін қалдырмай жеп койғанын жазды. Осындай қайғылы жағдайдың көрші Батпаққара ауданында да кеңінен орын алып отырғаны да айтылды.

Голощекин қазақ даласындағы жағдайды өзі жіберген уәкілдері арқылы жақсы біліп, толық хабар алып отырды. Арнайы тапсырмамен [[Сарысу ауданы]]нда болған О.[[Жандосов Ораз Қыйқымұлы|Жандосов]] мынадай мәлімет берді:<br>
«''Ауылдарды аралаған кезімде мен ондаған күндер бойы жерленбеген
мәйіттерді кездестірдім... [[Әйел]]дер жоқшылық пен [[аштық]]қа төзімділеу. Еркектердің бірден ұнжырғасы түсіп кетеді. Күйзелгендер қолдарына не түссе де түк қалдырмай жеп қояды. Сүйек-саяқты жинайды, оларды жүрек жалғау үшін ондаған мәрте қайнатады. [[Тамақ]] орнына жартылай өңделген терілер де кете береді. Мен иттің етін жеген және онысын жасырмайтын бірнеше адамдарды кездестірдім. Оныншы ауылдан келе жатқан жолымда елсіз жапаннан екі [[жасөспірім]]ді көрдім, Олар қайдағы бір ескі жұрттағы, атылған иттердің терісін алу үшін қалған өлімтіктеріне бара жатыр екен. 5-ауылда аштықтан жартылай ісінген, аяғы ауыр әйел маған жақын келіп, оған [[ит]] атып беруімді өтінді''».

Голощекиндік [[геноцид]] қазақстандықтарды, ең алдымен, қазақ халкын аштыққа және босқындыққа ұшыратты. Зарлаған ана, шырылдаған бала, түнеріп, өлексе сасыған қазақ даласы — большевиктік [[эксперимент]]тің нәтижесі осы еді.<ref>Қазақстан тарихы: Аса маңызды кезеңдері мен ғылыми мәселелері. Жалпы білім беретін мектептің қоғамдык- гуманитарлық бағытындағы 11-сыныбына арналған оқулық / М.Қойгелдиев, Ә.Төлеубаев, Ж.Қасымбаев, т.б. — Алматы: «Мектеп» баспасы, 2007. — 304 бет,суретті. ISBN 9965-36-106-1</ref>

== Себептері ==


1925 жылы Қазөлкекомның бірінші хатшысы болып ВКП(б)-ның белгілі қайраткері Филипп Голощёкин тағайындалды. Ол өз билігінің алғашқы екі жылын (1925—1927 жылдары) Қазақ өлкесінде өткізді. Сол кезде қазақтардың басым көпшілігі жартылай көшпелі болды. 1926 жылғы халық санағының деректері бойынша, қазақтардың төрттен бірі отырықшы, 6 %-ы жыл бойы көшіп-қонып жүрді, ал 65 %-дан астамы жартылай көшпелі болды (яғни тек жазда ғана көшіп-қонды).

Осы жылдары адамдардан мал-мүлкі тартып алынып, милицияның күзетімен «отырықшыландыру нүктелеріне» жіберілді. Колхоздардың қажетіне тәркіленген малды сол жерде сойып тастады, өйткені бір жерге жиналған үлкен табындарды асырау мүмкін болмады. 1933 жылға қарай 40 млн бас малдың шамамен оннан бір бөлігі ғана қалды. Мұндай әрекеттерден ең алдымен қазақтар зардап шекті, өйткені мал олардың негізгі, ал кейде жалғыз күнкөріс көзі болды.

Қазақстандағы алғашқы шара 1928 жылдың көктемі мен күзінде жүргізілген тәркілеу болды. Тәркілеуге 11 260 шаруашылық ілініп, олардан шамамен 4,5 млн бас мал (ірі қараға шаққанда) тартып алынды. Голощёкиннің өзі мойындағандай, кеңес өкіметінің бастапқы жоспары екі есе ауқымды болған: 15,0 млн басқа дейін (1920-жылдар статистикасына сәйкес ірі қараға шаққанда) тәркілеу көзделді, әрі «бай-жартылай феодалдардың» бір шаруашылығында 150 бастан артық мал қалмауы тиіс еді. Алайда 1928 жылғы тәркілеу жоспары ВКП(б) ОК мен КСРО ОАК-те бекітілген кезде Голощёкинге ескерту жасалып, басқа нормалар белгіленді: көшпелі шаруашылықтарға — 400 бас, жартылай көшпелілерге — 300 бас, отырықшыларға — 150 бас. Тәркіленуге тиіс шаруашылықтардың жалпы саны 7000-ға дейін қысқартылды.

1930/31 жылдардағы дайындау маусымының жоспарына сәйкес, Қазақстан 493,5 мың тонна тірі салмақта мал өткізуі тиіс болды, бұл бүкілодақтық көлемнің 18,4 %-ын құрады, ал оның жалпы мал басындағы үлесі 12 %-дан аспаған еді. Сонымен қатар Қазақстан үшін астық дайындаудың шамадан тыс көлемі белгіленді: 1930 жылы өнімділік гектарына 37,6 пұт болса, 1931 жылы 27,5 пұтқа дейін, яғни шамамен үштен біріне азайды. Соған қарамастан, алынған астық көлемі 33,1 млн пұттан 39,5 млн пұтқа дейін, яғни 20 %-ға өсті. Мұның бәрі жаппай ашаршылықтың басталуына алғышарттар жасады.
== Дереккөздер ==
{{дереккөздер}}

{{wikify}}
{{Kz-hist-stub}}

[[Санат:Қазақстан тарихы]]